საქართველოს პარლამენტის ეროვნული ბიბლიოთეკა ერთ–ერთი მემკვიდრეა 1879 წელს დაარსებული ქართველთა შორის წერა–კითხვის გამავრცელებელი საზოგადოებისა, აქვე დაცულია ამავე საზოგადოების უნიკალური ბიბლიოთეკა. პირველმა ქართველმა ფოტოხელოვანმა ალექსანდრე როინაშვილმა ქართველთა შორის წერა–კითხვის გამავრცელებელ საზოგადოებას სიცოცხლეშივე უანდერძა თავისი ფოტოსახელოსნო უძვირფასესი ფოტონეგატივების კოლექციით. ეს კოლექცია შემდგომში სხვადასხვა პირის ხელში მოხვდა, მისი დიდი ნაწილი ბოლოს ერმაკოვის მიერ იქნა შესყიდული და მან ეს ფოტოები თავის ფოტოფონდს შეუერთა.

საქართველოს პარლამენტის ეროვნულმა ბიბლიოთეკამ მიზნად დაისახა ქართული ფოტოგრაფიის ფუძემდებლის ალექსანდრე როინაშვილის სრული კოლექციის აღდგენა. პროექტით "ჩვენ ვეძებთ როინაშვილს" ბიბლიოთეკა თხოვს საქართველოს ყველა მოქალაქეს, ქვეყნის მუზეუმებს და ბიბლიოთეკებს ჩაერთონ აღნიშნულ პროექტში და მოგვცენ საშუალება ციფრულ ფორმაში გადავიტანოთ ალექსანდრე როინაშვილის ავტორობით შესრულებული ფოტოდოკუმენტები და განვათავსოთ ციფრულ ბიბლიოთეკა "ივერიელში". ამით ჩვენ აღვასრულებთ ქართული საზოგადოების სანუკვარ ოცნებას და შევქმნით ალექსანდრე როინაშვილის სრულ ფოტოკოლექციას.

პროექტში მონაწილეობის მსურველები გთხოვთ დაგვიკავშირდით შემდეგ ნომრებზე: 2971651, 2971655, 577436478 ან დაუკავშირდით "ივერიელის" ადმინისტრატორს.