ანტონ და ოლღა აღნიაშვილების ოჯახი

Abstract

ქეთევან ზაალიშვილი - გეოგრაფი, დამსახურებული პედაგოგი. დაამთავრა თბილისის სახლემწიფო უნივერსიტეტის გეოგრაფიის ფაკულტეტი, დაჯილდოებულია ლენინის ორდენით. უნივერსიტეტის პედკაბინეტის გამგე, უნივერსიტეტის გეოგრაფიული საზოგადოების აქტიური წევრი. თამარ ზაალიშვილი - რუსული ენის სპეციალისტი, პედაგოგი. დაამთავრა ქალთა უმაღლესი კურსები, 45 წლის განმავლობაში ეწეოდა პედაგოგიურ მოღვაწეობას, დაჯილდოებულია ლენინის ორდენით და მთავრობის სხვა ჯილდოებით. თამარ ზაალიშვილი თავის ოჯახთან ერთად ახალგაზრდობის წლებიდან აქტიურად მონაწილეობდა საქველმოქმედო და სახელმწიფოებრივ ღონისძიებებში. ნიკოლოზ ზაალიშვილი - მოსამართლე, მსახურობდა თბილისის სასამართლოში. მისი მამა შეძლებული, გავლენიანი აზნაური გახლდათ (“ტახტის აზნაური”). ნ. ზაალიშვილი პენსიაზე გასვლის შემდეგ იყო თბილისის სახლემწიფო უნივერსიტეტის პრორექტორი. იგი აქტიურ საზოგადოებრივ ცხოვრებას ეწეოდა, იყო იმჟამად არსებული ცნობილი “ქართული კლუბის” წევრი თავის ოჯახთან ერთად, მონაწილეობდა საქველმოქმედო და სახელმწიფოებრივ ღონისძიებებში. ნიკოლოზ აღნიაშვილი - ინჟინერი, ცხოვრობდა და მსახურობდა ოჯახთან ერთად საქართველოში აგრეთვე წლების განმავლობაში პოლონეთსა და შვეიცარიაში. ანტონ აღნიაშვილი - გახლდათ ქვემოჭალის ღვთისმშობლის შობის ეკლესიის მღვდელი. 1890 წელს დაჯილდოვდა კამილავკით. 1894 წელს დაინიშნა გორის მაზრის პირველი ოლქის სამღვდელოების სულიერ მოძღვრად. 1901 წლის 6 მაისს დაჯილდოვდა სამკერდე ოქროს ჯვრით. 1903 წლის 17 სექტემბერს დაინიშნა მუხრანის ღვთისმშობლის მიძინების ტაძრის წინამძღვრად. 1904 წლის 25 იანვარს გადადგა შტატიდან მისივე თხოვნის საფუძველზე. შემდგომში ცხოვრობდა თბილისში ოჯახთან ერთად. შალვა ზაალიშვილი - დაამთავრა თბილისის სახელმწიფო უნივერსიტეტი, გახლდათ გორის საკონსერვო ქარხნის დირექტორი, კინო “რუსთაველის’ დირექტორი. იგი იყო გადასახლებული ციმბირში, საიდანაც დაბრუნდა 1948 წელს.