ბალნეო-კლიმატური კურორტი ჯავა

Abstract

კურორტი ჯავა ცხინვალის რეგიონში, ჯავის მუნიციპალიტეტში მდებარეობს, კავკასიონის სამხრეთ კალთებზე, მდინარეების დიდი ლიახვის, ყვირილის და ჯეჯორის ხეობებში. ჯავა ამჟამად ოკუპირებულია რუსეთის მიერ. იგი ბალნეო-კლიმატური კურორტია, რომლის მთავარი სამკურნალო ფაქტორია მინერალური წყალი - ძაუ. მთებსა და ტყეებში ჩაფლული ეს ულამაზესი კურორტი შესანიშნავია ბუნებაში დასვენების მოყვარულთათვის. გარდა ბუნების მშვენიერებისა კურორტ ჯავის ტერიტორიაზე საინტერესო კულტურული ძეგლებიც გვხვდება. აქ აღმოჩენილია ქვის ხანის გამოქვაბულ-საცხოვრისები, ნახავთ აგრეთვე შუასაუკუნეების რამდენიმე კოშკსა და ეკლესიათა ნაშთებს. დაბა ჯავა ჯავის მუნიციპალიტეტის ადმინისტრაციული ცენტრია. თავად ჯავის რაიონის ტერიტორიაზე აღმოჩენილია ქვის, ბრინჯაოსა და რკინის ხანის ნასახლარები და სამაროვნები. მუნიციპალიტეტის ტერიტორიაზე გადიოდა ტრანსკავკასიური მაგისტრალი, რომელიც სამხრეთ კავკასიას როკის გვირაბით ჩრდილოეთთან აკავშირებს. ჯავის რაიონი გამოირჩევა მრავალფეროვანი ბუნებითა და კულტურული ძეგლების სიმრავლით. მთები, ტყეები, ულამაზესი ტბები და ჩანჩქერები, შუასაუკუნოვანი ტაძრები და ციხე-კოშკები მიმზიდველ გარემოს ქმნის მოგზაურთათვის. ჯავის ერთ-ერთი პოპულარული ადგილია სოფლებს - ბითეთსა და სარიტათს შორის მდებარე ერწოს ტბა, რომელიც ულამაზეს სანახაობას წარმოადგენს, როგორც გაზაფხულის სიმწვანეში, ასევე შემოდგომის ფერადოვნებისას.